Рейтинг:  0 / 5

Ҳамюртимиз Усмон Тошев мураббийлик қилаётган Тожикистон терма жамоаси ЖЧ-2022 ва ОЧ-2023 саралаш баҳсларига жиддий тарзда тайёргарлик кўриш ниятида жорий йилнинг 27 январь – 7 январь кунлари Тожикистон пойтахти Душанбе ҳамда БААнинг Дубай шаҳрида ўқув-машғулот йиғинини ўтказади.

Мазкур йиғин доирасида тожикистонликлар 1 ва 5 февраль кунлари Дубай шаҳрида Иордания термасига қарши 2 та ўртоқлик ўйинлари ўтказишни режалаштиришган.   

Тожикистон терма жамоасининг ушбу йиғинига “Навбаҳор”нинг 21 ёшли маҳоратли ярим ҳимоячиси Эҳсони Паншанбе ҳам чақирилди.

Биз Паншанбега терма жамоа машғулотларида куч-қувват, ўртоқлик баҳсларида эса омад ёр бўлишини тилаб қоламиз.

“Навбаҳор” ПФК матбуот хизмати.              

Рейтинг:  0 / 5

“Навбаҳор” жамоаси қишки трансферлар ойнаси вақтида ўз сафини бир қатор футболчилар билан бойитиб олмоқда.

Куни кеча жамоага келиб қўшилган легионер футболчилардан ташқари аввалроқ “Андижон” жамоасидан Фарҳод Мираҳматов ва Хушнудбек Авиловлар ҳам “лочинлар” таркибини тўлдиришган эди. Кеча “Андижон” билан ўртоқлик учрашувида мураббийлар штаби янги футболчиларга ҳам имконият беришди. Биз эса Хушнудбек Авиловнинг фикрлари билан қизиқдик.

- Қишки ўқув-йиғин машғулотлари қандай кетмоқда?

- Машғулотлар режадагидек ўтмоқда. Жамоага қўшилиб кетишим бошида бироз қийин бўлганини айтмаса, ҳозирда бари кўнгилдагидек дея оламан. 

- “Андижон” билан ўртоқлик учрашувида мураббийлар қандай кўрсатмалар беришди?

- Ўртоқлик учрашувида яхши ҳаракат қилдик, мураббийларимиз машғулотларда қилинган ишларни ўйинда кўрсатишимиз лозимлигини таъкидлашди. 

- Нўъмон Ҳасанов сизга бегона эмас, ушбу мутахассис қўл остида “Қўқон-1912”да тўп тепгансиз. Шу боис, талабларидан хабарингиз бор, демак, тушунишда муаммо бўлмаяпти...

- У пайтлар футбол бошқача эди. Миллионлар ўйинида кундан - кунга янгиликлар юз бермоқда. Шу сабабли, Нўъмон аканинг ҳам футболга бўлган қарашлари ўзгарган дейишим мумкин. 

- “Навбаҳор” фаолиятингизда янги саҳифа очишига ишонасизми?

- Шу кунларда клуб билан расман шартнома имзолайман. “Навбаҳор”даги ўйинларим орқали Ўзбекистон миллий терма жамоасидан чақирув олишни ният қилганман. Айни пайтда жамоамизда яхши савиядаги футболчилар йиғилган. 

- Сизни мухлислар 2016 йил Баҳрайндаги ёшлар ўртасидаги Осиё чемпионати орқали танишган. Ушбу турнирдан қандай хотиралар қолган?

- 2016 йилги Осиё чемпионатидан яхши таассуротлар қолган. Ўшанда битта ўйинда ютганимизда, жаҳон чемпионатига чиққан бўлардик. Лекин омадимиз келмаганди. Шуни айтишим мумкинки, мураббийлар штаби ва футболчилар аҳил эди. Битта оила сифатида шакллангандик. Ўша кунлар учун Худога шукур қиламан. 

- Наманганда доим босим юқори. “Навбаҳор” жамоасидан ҳамиша ғалаба кутишади...

- Ҳа, тўғри. “Навбаҳор”да доим босим юқори бўлади. Аммо ҳар хил футбол бор. Айримларга бундай босимда ўйнаш манзур келади, яна баъзиларга эса аксинча. Менга ушбу ҳолат ёқади.

Манба: championat.asia.

Рейтинг:  0 / 5

Хабар берганимиздек, бугун жамоамиз жорий йилги илк ўртоқлик баҳсини Наманган шаҳридаги “Ёш куч” стадионида Андижоннинг “Андижон” жамоасига қарши ўтказиб, 1:0 ҳисобида ғалаба қозонди.

Мазкур ўйинни бевосита стадионда  кузатиш ниятида Наманган вилоят ҳокими, вилоят футбол ассоциацияси президенти Шавкат Шокиржанович Абдураззоқов ташриф буюриб, учрашувни стадион трибунасида томоша қилди.

Шунингдек, Шавкат Шокиржанович тажрибали мураббий Виктор Жалилов, сербиялик мураббий Дражен Дукич ва унинг ватандошлари – Никола Тасич ҳамда Марко Путинканин билан учрашиб, суҳбатлашди.

“Навбаҳор” ПФК матбуот хизмати. 

Рейтинг:  0 / 5

Ўртоқлик баҳси

“Навбаҳор” – “Андижон” – 1:0 (0:0)

Наманган. “Ёш куч” стадиони. 150 томошабин.

Ҳакамлар: Ғайрат Жўраев, Максим Нехочин, Абдураҳим Жабборов.

Гол: О.Юсупов (89).

“Навбаҳор”: Ўткир Юсупов, Эҳсони Паншанбе, Азимжон Аҳмедов, Иван Соловьёв, Азизбек Турғунбоев, Сардор Теляков, Мирзоҳид Ғофуров, Давронбек Ҳошимов, Игорь Голбан, Ислом Рашидхонов, Забиҳилло Ўринбоев.

Захирадан майдонга тушганлар: Исломхон Абдуллахонов, Улуғбек Эгамбердиев, Шерзод Ғуломжонов, Самуэль Илие, Мирзоҳид Мирзамаҳмудов, Хушнудбек Авилов, Фарҳод Мираҳматов, Шаҳзодбек Ҳамидов, Бобур Мамажонов, Абдулҳай Исмоилов, Жамолиддин Баҳромов, Комил Тожиддинов, Достон Абдулаҳаев, Ориф Юсупов, Аббос Ғуломов, Ҳусайн Эргашбоев.

“Андижон” (бошланғич таркиб): Жасур Умирзоқов, Миркомил Локаев, Камрон Нажафалиев, Усмонали Исмоналиев, Абдувоҳид Ғуломов, Бахтиёр Қосимов, Муҳаммадкарим Тоиров, Камрон Саидазимов, Фарҳод Соҳибжонов, Суннатилла Мамадалиев, Жамшид Ҳомидов.        

 Бугун Наманган шаҳридаги “Ёш куч” стадионида жамоамиз бу йилги  илк ўртоқлик баҳсини Андижоннинг “Андижон” жамоасига қарши ўтказди.

Жамоамиз мураббийлари мазкур ўртоқлик учрашувининг 1-бўлимида тажрибали футболчиларни майдонга туширишган бўлса, 2-бўлимда бир қатор ёшлар, шунингдек, кўрикдан ўтаётган ўйинчиларни туширишди.

Мазкур ўйинни Наманган вилоят ҳокими, вилоят футбол ассоциацияси президенти Шавкат Шокиржанович Абдураззоқов ҳам бевосита стадион трибунасида кузатди.

Учрашув борасида тўхталадиган бўлсак, ўйин анча кескин курашлар остида кечди. Биринчи бўлимда ташаббус кўпроқ мезбонлар тарафида бўлса-да, ҳужумлар якунига етмади.

Танаффусдан кейин ҳар икки жамоа аъзолари қизиқарли ўйин намойиш этишди. 

Учрашувдаги ягона гол 89-дақиқада урилди. Ўша вазиятда Шерзод Ғуломжонов бурчак зарбасини амалга ошириб, тўпни рақиб жарима майдончаси ичига етказиб берди. Ориф Юсупов тўпни боши билан андижонликлар дарвозасига аниқ йўллаб, ҳисобни очди – 1:0.

Мазкур гол эса “лочинлар”га ғалаба келтирди.   

“Навбаҳор” навбатдаги назорат-синов баҳсини яна “Андижон”га қарши 16 январь куни ўтказади.

“Навбаҳор” ПФК матбуот хизмати.