Coca Cola Суперлига 19-туридан ўрин олган “Турон” – “Навбаҳор” (0:1) жамоалари ўртасидаги ўйиндан кейинги матбуот анжуманининг биринчи қисмида “Навбаҳор” жамоаси бош мураббийи Виктор Жалилов иштирок этиб, ОАВ ходимларининг саволларига жавоб берди.
Қуйида унинг фикрлари эътиборингизга ҳавола этилмоқда.
- Ўйин оғир кечди. Албатта, бугун омад ҳам биз томонда бўлди. Захира алмашишлари орқали ўйинни кучайтиришга уринишимизга қарамай, иккинчи бўлимда вазиятлар ярата олмадик. Мазкур майдонда “Қўқон-1912” билан бўлиб ўтган баҳсимиздан кўра, қийинроқ ўйин ўтказдик (Coca Cola Суперлига 13-туридан ўрин олган ўша учрашувда жамоамиз қўқонликлар устидан 2:1 ҳисобида ғалаба қозонганди) бугун. “Пахтакор”га қарши кечган Тошкентдаги баҳсдан сўнг, сафарда яна бир учрашув ўтказдик. Шу боис, футболчиларимизда чарчоқ сезилди.
Ўйинга алоҳида режа тузамиз. Ким қандай тайёргарликка эга бўлса, позицияларда самара келтира олса, ўша футболчи майдонга тушади. Коста Гуттинер Қаршидаги ўйинимизда ҳам захирадан майдонга тушиб, ўйинни кучайтирганди. Албатта, таркибда ротация қилинади. Бу мураббийлар штабининг қарори, кимнинг асосий таркибда майдонга тушишини мураббийлар штаби ҳал қилади.
Иван Соловьёвнинг жароҳати бор эди. Унинг ўзи кучим етганича ўйнайман, майдонга тушаман, дегани учун майдонга туширгандик. Жароҳати қийнагани учун уни алмаштирдик. Мухлисларнинг қайтгани ҳам ўйиннинг шиддатига ижобий таъсир ўтказади, албатта. Уларнинг борлиги ҳам футболчиларга куч бағишлайди.
Бир мавсумда 30 та ўйин ўтказиш бу кам. Мавсум давомида камида 40 та ўйин бўлса, яхши бўларди.
Қисқа муддатда кўп ўйин ўтказиш футболчиларнинг жисмоний ва руҳий ҳолатларига салбий таъсир ўтказади. Уларнинг майдонда кераксиз пайтда сариқ карточка олишлари ҳам шу билан боғлиқ, деб ўйлайман. Фақат бир ҳужумчи билан ўйнаётганимизнинг сабаби, ярим ҳимоядаги бошқа футболчилар ҳам ҳужум пайти ягона ҳужумчини қўллаб-қувватлашади, шундай экан, олдинда ҳужумчилар сонининг нечталиги муҳим аҳамият касб этмайди.
“Навбаҳор” ПФК матбуот хизмати.